Numeri 14:24 My dienaar Kaleb het egter ’n ander gesindheid teenoor My gewys. Hy het by My bly staan. Ek sal hom in die land laat kom wat hy gaan verken het. Sy nageslag sal die land besit. (NLV)

Ons het al by die gebeurtenis stilgestaan waar Moses 12 manne die Beloofde Land ingestuur het. Tien het teruggekom en gebewe van vrees vir die mense van die land. Maar daar was twee wat dit heel anders gesien het. Die een was Josua en die ander Kaleb.

Kaleb was anders. Hy het nie toegelaat dat hy saam met die stroom meegesleur word nie. Hy het sterk bly staan. Hy het so sterk in sy siening geglo dat hy en Josua by die aanhoor van die klaagliedere oor die land tranerig geraak het en selfs hulle klere geskeur het.

Hy smeek amper by die volk en vertel wat hy met sy eie oë gesien het. Hy beskryf hoe mooi die land is en hoe vrugbaar die grond is. Dit is ʼn land waar hulle lekker kan werk en speel en woon. Dis waarlik die Beloofde Land.

Die volk kies egter om na die tien ander manne te luister, en toe is hulle pad af.

Daarom kom God se uitspraak dat die hele generasie in die woestyn sal sterf, maar dat Kaleb die land sal binnegaan en sy nageslag sal dit erf. Hy het ʼn ander gesindheid gehad as die res.

Dis die verskil van iemand wat in ʼn intieme verhouding met God staan. Die Gees wat in hom woon, help hom om die regte keuses te maak, al is dit heeltemal in die teenoorgestelde rigting van die res van die mense.

Kaleb wys vir ons hoe lyk ’n mens wat so naby aan God leef dat vrees nie meer die laaste sê het nie. Hy kies God se belofte bo die skare se paniek, en daarom stap hy uiteindelik in wat ander net van ver af gesien het.

Mag die Here ook vir ons ’n ander gees gee, sodat ons voluit vir Hom leef, al loop ons alleen.

Gebed
Vader, dis regtig maklik vir my om die skare te volg. Dit kom nie vanself om stroomop na U te swem nie, maar ek weet en glo dat dit met die hulp van die Heilige Gees makliker is …

Vrae
Waar in my lewe volg ek die skare eerder as God se leiding?
Is daar ’n area waar ek weet God roep my om anders te wees?
Wat hou my terug om voluit vir God te staan, al staan ek alleen?

Doen dit nou
Identifiseer vandag een plek waar jy weet jy saam met die stroom gaan, maar nie saam met God nie.
Bid spesifiek daaroor en vra die Heilige Gees vir moed om reg te kies.
Doen vandag een klein, konkrete ding wat wys jy kies God se pad bo die skare s’n, al voel dit ongemaklik.