Hoërgraad vergifnis
My hele liggaam is oortrek met hoendervleis as ek die storie van Elana (skuilnaam) hoor:
Ek en my man was amper 30 jaar getroud toe my dogter agterkom dat my man trouplanne met ’n ander vrou maak. Dit terwyl ons nog getroud is!
Kort hierna het ek uitgevind dat die kanker in my bors versprei het en dat ek 8 gewasse op my rugstring het. Waar ek graad 1 kanker gehad het, het ek ewe skielik graad 4 kanker. Die ergste was dat ek alles moes deurgaan sonder enige ondersteuning van my man.
Inteendeel, daar was baie harde woorde tussen my en my man. Hy het ons oudste dogter afgeskryf en sy het haar pa ook afgeskryf. Ek was nog steeds woedend vir my man en om hom te vergewe was nie ’n opsie nie.
Ons besigheid was op my naam en ek het seker gemaak dat hy geen tekenregte het nie. Kortliks gestel: hy was bankrot, geen besigheid of geld nie. Ek het die besigheid met al die geld gevat. Ek wou hom ‘n les leer en seermaak soos hy my seergemaak het!
Vir 2 weke het ek so aangegaan totdat God my tot stilstand gebring het en my gevra het of ek nou gelukkig is. Het ek nou bereik wat ek wou bereik?
Ek het teruggedink en die seer was nog steeds daar. Tog het ek geweet God wil hê ek moet ’n ander pad stap.
Ek het hom gekontak en verskoning gevra vir wat ek gedoen het. Hy het nog nooit vir my gesê dat hy jammer is dat hy my so seergemaak het nie. Ek het hom in trane meegedeel dat ek hom vergewe vir wat hy aan my gedoen het, maar dat ek ‘n egskeiding wil hê. Ek het ons besigheid met al die geld vir hom teruggegee.
My 2 dogters, veral my oudste, kon nie verstaan hoe kon ek hom vergewe vir wat hy aan ons gedoen het nie. Ek het hulle vertel van my gesprek met God en ook dat God vir my gesê het dat Hy al my sondes vergewe het, hoe kan ek nie dieselfde met my man/hulle pa doen nie.
Ek het hom onvoorwaardelik vergewe.
Ek het begin bid dat die verhouding tussen hom en ons kinders sal herstel. Dit was ‘n baie moeilike tyd met baie verwyte van beide kante af. Soms het ek gedink dit sou nooit regkom nie.
Prys die Here! Ek en my man is die beste vriende ooit. My 2 dogters se verhouding met hulle pa is beter en sterker as wat dit ooit was.
Ek is nou al 3 jaar enkellopend en het steeds graad 4 kanker, maar ek is gelukkig, want ek het ‘n ongelooflike paadjie met my God gestap. Baie dae kon ek nie meer nie, dan het Hy my gedra. Ek het die afgelope tyd geleer jy is tot alles in staat as jy God by jou het.
Elana verstaan en doen presies die opdrag: 15Sê vir ander gelowiges om nie wraak te neem nie. As iemand iets leliks aan hulle gedoen het, mag hulle nie iets leliks terugdoen nie. Sorg eerder dat julle van vroeg tot laat goeie dinge aan mekaar en aan ander mense buite die kerk doen.
En jy?
Teks
Dink bietjie hieroor
Wie moet jy vergewe?
Hoe moet jy dit doen?
Het jy die Heilige Gees gevra om jou te help?
Gebed
Here, ek sukkel om te vergewe. Op my eie kan ek dit nie regkry nie. Mag U Heilige Gees my asseblief hierin help. Amen.
